Kako vrijeme više odmiče, a nauka sve više upozorava na opasnosti od klimatskih promjena, na ulicama vidimo povećan broj vozila na struju. Počev od automobila, preko skutera, do električnih trotineta i bicikala. Mnogi se pitaju da li je i takva budućnost transporta održiva, s obzirom na to da baterije koje daju snagu vozilima mogu biti itekako štetne, naročito ako se po isteku svog životnog vijeka ne odlože na ispravan način.
Sličnom tematikom bave se i neki korisnici društvenih mreža koji su cijelu priču preokrenuli u korist agende koju propagiraju, a koja se u suštini ruga zelenom transportu.
U jednom postu pojavio se snimak “groblja” žutih skutera, o čemu autor kaže:
Groblje električnih zelenih skutera kojima je ponestalo baterije
Pošto je zamjena baterija veoma skupa, električni skuteri koji su došli do kraja životnog ciklusa baterija se potpuno napuštaju, a njihovo odlaganje na bilo koji drugi način bilo bi opasno i skupo.
Ekološki prihvatljiv EV transport.
Sporni post pojavio se nedavno, a priča o “groblju” datira u stvari još od 2021. Za razliku od tvrdnje autora – da su skuteri napušteni jer su im baterije “gotove”, a njihovo odlaganje neisplativo, istina je drugačija. Kolege iz italijanskog Open-a došle su do članka na jednom kineskom portalu od prije dvije godine, u kojem se navodi da je veliki broj skutera povučen iz grada Čangša, u centralnoj Kini.
Razlog? Nijesu baterije, već preopterećenost grada ovim dvotočkašima. Gradske vlasti su praktično napravile čistku, jer je broj žutih skutera u gradu postao prevelik, pa su “bili parkirani na sve strane”.
Slično se dogodilo i 2018. kada su kineske vlasti sa ulica uklonile gomile bicikala.
Open je ranije radio sličan tekst koji se ticao električnih automobila u Francuskoj. U pitanju je bila gotovo ista tvrdnja – da su automobili napušteni jer su baterije “mrtve”, a ne isplati se zamijeniti ih. I tada je, kao u ovom slučaju, dokazano da se radi o manipulaciji činjenicama, jer su automobili bili parkirani zato što je kompanija u čijem su vlasništvu poslovala loše i stopirala je flotu, nakon čega je data na prodaju.
Ova objava dobija ocjenu – manipulisanje činjenicama.
Ocjenu “Manipulisanje činjenicama” dobija medijski izvještaj koji koristi poznate i tačne činjenice, ali ih interpretira na obmanjujući način. Ovi izvještaji uglavnom koriste tačne informacije za izvođenje netačnih zaključaka ili tvrdnji, čime usmjeravaju zaključke konzumenata medijskog sadržaja u pogrešnom smjeru u odnosu na stvarno značenje predstavljenih činjenica.
